शामुएल मोरिस
| जन्म | : सन् १८७३ |
| जन्म स्थान | : लाइबेरिया |
| दर्शन स्थल | : अफ्रिका |
| निधन | : सन् १८९३ १२ मे |
सन् १८७३ मा पश्चिम अफ्रिकाको लाइबेरियाको एउटा सानो गाउँमा कबू(शामुएल मोरिस)को जन्म भएको थियो । उनी क्रु जनजातिको आदिवासी प्रमुखको जेठो छोरा थिए र राजकुमार थिए । जब उनी १४ वर्षका थिए, उनको जाति क्रूलाई ग्रेबोस जातिले आक्रमण गर्यो । कबूलाई कब्जा गरियो र बन्धकको रूपमा प्रयोग गरियो । कबूलाई हेर्न र उसको सुरक्षा सुनिश्चित गर्न ग्रेबोसले क्रुलाई प्रत्येक महिना केही तिर्न बाध्य पारे । कबूका बुबा प्रमुख प्रत्येक पटक आए, तर ग्रेबोसले उनले ल्याएको कुरालाई निरन्तर अस्वीकार गरे । अन्ततः क्रुले थप ल्याउन सकेन र कबूलाई दिनहुँ यातना दिन थाल्यो । कबू आफ्नो मृत्युको पर्खाइमा थिए ।
एक दिन तीव्र कोर्रा लगाएर छोडेको बेला खम्बामा बाँधिएको हुँदा कबूले एउटा उज्यालो ज्योति देखे र आकाशबाट उनको नाम बोलाएको र भाग्नु भनेको आवाज सुने । एक्कासि उसलाई बाँधिएको डोरी भुईँमा खस्यो; उनले आफ्नो पूर्ण बललाई प्रयोग गरेर जङ्गलमा भागे ।
दिनहरू लुक्दै र रातमा यात्रा गर्दै धेरै दिन पछि उनी राजधानी मोनरोभिया आइपुगे । त्यहाँ उनले खेतमा काम पाए, जहाँ एक जवान केटाले कबूलाई चर्चमा निम्तो दिए । त्यहाँ मण्डलीमा मिसनरी सुश्री नोल्सले प्रेरित पावलको परिवर्तनको बारेमा प्रचार गर्नुभयो । कबूले तुरुन्तै आफ्नो घटना र पावलको घटनाबिच समानता देखे । केही समयपछि उनले ख्रीष्टलाई मुक्तिदाताको रूपमा स्वीकार गरे, र बप्तिस्मा लिए र उनको नाम शामुएल मोरिस राखियो ।
मोरिसले अर्को दुई वर्ष मोनरोभियामा घरहरूमा रङ लगाउने काममा बिताए । उनी इसाई समुदायको जोसिलो सदस्य बने, र पवित्र आत्माको बारेमा सिक्ने तीव्र इच्छा देखाए । सुश्री लिस्सि मेक्नीलले उनलाई अमेरिका यात्रा गर्न र उनको अगुवा स्टीफन मेरिटको निर्देशन खोज्न प्रोत्साहित गरिन् । पैसा वा यातायातको साधनबिना मोरिसले पैदल यात्रा सुरु गरे ।
रोबर्टस्पोर्ट बन्दरगाहमा मोरिसले काम गरेबापत यात्रा गर्न दिने जहाज भेटाउने बेलासम्म समुद्र तटमा रात बिताउँदै धेरै दिन पर्खी रहे । यात्रा कठिन थियो; मोरिसलाई प्रायः कुटपिट गरिन्थ्यो र सबैभन्दा खतरनाक कामहरूमा खटाइयो । यद्यपि सन् १८९१ सेप्टेम्बरमा जहाज न्यु योर्क पुग्दा कप्तान र अधिकांश चालक दलले मोरिसको साक्षीको कारण ख्रीष्टलाई स्वीकार गरिसकेका थिए ।
अमेरिका पुगेपछि स्टीफन मेरिटले मोरिसलाई न्यानो स्वागत गरे । उनले टेलर विश्वविद्यालयका तत्कालीन अध्यक्ष थाडियस रीडलाई सम्पर्क गरे र मोरिसलाई विद्यालयमा भर्ना गर्न अनुरोध गरे । टेलर विश्वविद्यालयको आर्थिक ऋणको कारण रीडले व्यक्तिगत रूपमा मोरिसको लागि कोष सुरु गरे । रीडको प्रयासलाई पछि “विश्वास कोष” भनेर चिनियो ।
सन् १८९१ डिसेम्बरमा मोरिस टेलरको क्याम्पसमा आइपुगे । रीडले आफूलाई कुन कोठा चाहनुहुन्छ भनेर सोध्दा मोरिसले जवाफ दिए, “यदि यहाँ कसैले नचाहेको कोठा छ भने, त्यो मलाई दिनुहोस् ।” मोरिसको विश्वासले स्थानीय समुदायमा यस्तो गहिरो प्रभाव पारेको थियो, कि उनलाई बारम्बार स्थानीय मण्डलीहरूमा बोल्न निमन्त्रणा दिइयो । राती उसले आफ्नो कोठामा प्रार्थना गरिरहेको सुन्न सकिन्थ्यो, जसलाई उसले “मेरो बुबासँगको बातचित” भनी भन्थे ।
अध्यक्ष रीडले एक पटक भनेका थिए, “शामुएल मोरिस टेलर विश्वविद्यालयमा ईश्वरीय रूपमा पठाइएको सन्देशवाहक थिए । उनले सोचे कि उनी यहाँ आफ्ना मानिसहरूबिचको आफ्नो मिशन सेवाको लागि तयार हुन आएका थिए, तर उनको आगमन टेलर विश्वविद्यालयलाई सारा संसारमा यसको मिशनको लागि तयार पार्नको लागि थियो । उनलाई भेट्ने सबै उनको परमेश्वरप्रतिको अचम्मको तर सरल विश्वासबाट प्रभावित भए ।”
अमेरिकाको इन्डियानाको चिसो हावापानीका कारण, जुन उनलाई बानी थिएन, शामुएल प्रायः बिरामी पर्न थाले । उनले आफूलाई निको पार्न परमेश्वरलाई प्रार्थना गरे, तर पृथ्वीमा शामुएलको काम सकिसकेको थियो । सन् १८९३ १२ मेमा अमेरिका आएको पाँच वर्षपछि शामुएल मोरिसको कडा चिसोको कारण मृत्यु भयो । तर उनको जीवन त्यहाँ समाप्त भएन । परमेश्वरले शामुएलको सरल विश्वास र बलियो प्रार्थनाको जीवनलाई शक्तिशाली तरिकामा प्रयोग गर्नुभयो । एक दिन आफ्नै मानिसहरू र संसारभरि पनि सेवा गर्न फर्कने उनको सपना पूरा गर्ने गरी टेलर विश्वविद्यालयका धेरै विद्यार्थीहरूले सुसमाचार लिएर अफ्रिका गए । शामुएल मोरिस नामका एक जवान अफ्रिकी मानिसको विश्वासको कारण टेलर विश्वविद्यालयले आजसम्म पनि विश्वभरि मिसनरीहरू पठाइरहेको छ।
ख्रीष्टमा समर्पित जीवन कहिल्यै व्यर्थ हुँदैन!
